1. OBXECTO
As presentes bases teñen por obxecto regular a convocatoria e participación no PROGRAMA MUNICIPAL DE CONCILIACIÓN DO CONCELLO DE ANTAS DE ULLA 2025/2026, co fin de facilitar a conciliación da vida persoal, laboral e familiar das familias con fillas e fillos menores ao seu cargo.
Este programa consiste en ofrecer ás familias que inician ou rematan a súa xornada laboral fóra do horario das actividades lectivas do centro escolar, un servizo de atención dentro do recinto do CEIP Plurilingüe Antas De Ulla que inclúe acollida, acompañamento educativo e lecer en igualdade.
As accións contempladas no PROGRAMA MUNICIPAL DE CONCILIACIÓN DO CONCELLO DE ANTAS DE ULLA 2025/2026 levarase a cabo por un equipo técnico especializado en ocio e tempo libre.
Este programa desenvólvese ao abeiro da subvención do Plan Corresponsables da Consellería de Política Social e Igualdade Xunta de Galicia (Orde do 3 de xaneiro de 2025, pola que se establecen as bases reguladoras das subvencións ás entidades locais da Comunidade Autónoma de Galicia para a promoción da igualdade, de forma individual e mediante o sistema de xestión compartida, cofinanciadas parcialmente polo Fondo Social Europeo Plus (FSE+) no marco do Programa FSE+ Galicia 2021-2027, e se procede á súa convocatoria para o ano 2025 (códigos de procedemento SI436A, SI435A e SI427B), suxeito ás normas de aplicación.
2. PERSOAS DESTINATARIAS. REQUISITOS
As destinatarias do programa serán familias con persoas menores de idade ao cargo que estean escolarizadas no CEIP Plurilingüe de Antas de Ulla e que precisen conciliar a súa vida laboral e/ou formativa coa atención ás crianzas.
2.1. Requisitos específicos:
- Situación de activo laboral das persoas responsables legais
- Familias monomarentais ou monoparentais en situación de activo laboral. Nos supostos de separación ou divorcio atenderase a que este requisito se cumpra respecto da persoa que se atope a cargo da persoa participante.
- Familias vítimas de violencia de xénero.
- Familias de especial consideración que acrediten, mediante informe técnico dos Servizos Sociais de atención primaria do concello de Antas de Ulla a necesidade de apoio no coidado das súas fillas/os.
- Non padecer enfermidades infecto-contaxiosas nin trastornos de comportamento que poidan afectar ó desenvolvemento da actividade.
- Aceptación expresa das presentes bases por parte da familia solicitante.
No caso de que a persoa participante precise apoio derivado da súa diversidade funcional, deberá facelo constar na folla de inscrición, especificando o máis posible as necesidades especiais que presente. Neste caso realizarase unha valoración por parte do Concello de Antas de Ulla sobre a viabilidade da participación en función dos recursos dispoñibles e organización do programa.
3. DESCRICIÓN DO PROGRAMA
O PROGRAMA MUNICIPAL DE CONCILIACIÓN DO CONCELLO DE ANTAS DE ULLA 2025/2026 desenvolverase nas instalacións dispoñibles do concello de Antas de Ulla durante o curso escolar, con inicio o día 8 de setembro de 2025 ata o 19 de xuño de 2026, ambos incluídos, segundo establece a Orde do 8 de maio de 2025 pola que se aproba o calendario escolar para o curso 2025/26 nos centros docentes sostidos con fondos públicos na Comunidade Autónoma de Galicia (DOG nº 92 do 15 de maio de 2025).
Non se prestará servizo os días que coincidan en festivo. Así mesmo, prestarase o servizo nos períodos non lectivos de Nadal, Semana Santa e días non lectivos e non festivos que coincidan de luns a venres.
Para a realización de saídas fóra das instalacións será preciso autorización expresa por escrito.
3.1. Servizos e horarios
Durante o período do curso escolar 2025-2026 o servizo de conciliación consiste en:
- Conciliación mañá: servizo previo á actividade lectiva no que se desenvolven actividades de almorzo saudable, acompañamento educativo e lecer en igualdade. O almorzo será proporcionado polo Concello seguindo as recomendacións do Real Decreto 315/2025, de 15 de abril, polo que se establecen normas de desenvolvemento da Lei 17/2011, de 5 de xullo, de seguridade alimentaria e nutrición, para o fomento dunha alimentación saudable e sostible en centros educativos. O límite de horario para administración de almorzo é ás 8:45h. O horario do servizo de mañá será de 7:30 a 9:30h.
- Conciliación tarde: servizo de acompañamento nas tarefas escolares e lecer en igualdade posterior á actividade lectiva que inclúe servizo de merenda proporcionada polas familias. O horario será de 15:15h a 19:00h, con dúas quendas de recollida: unha primeira entre as 17:00h e 17:15h, e unha segunda ás 19:00h. A recepción das persoas participantes farase á saída do colexio polo equipo monitor e a recollida na porta das aulas do servizo entre o equipo monitor e as persoas autorizadas.
- Períodos vacacionais non lectivos e non festivos (de luns a venres): horario de mañá de 8:30 a 14:30 horas.
3.2. Prazas
Ofertaranse un total de 20 prazas para o servizo de mañá, 30 prazas para a primeira quenda de tarde e 20 prazas para a segunda quenda de tarde.
Levarase un control de asistencia diaria co fin de garantir un uso responsable do servizo, non podendo superar o 20% de ausencias inxustificadas no período solicitado. A persoa que non xustifique estas ausencias perderá o seu dereito a desfrutar do servizo de xeito automático e a praza ofertarase á seguinte persoa en lista de agarda.
Consideraranse faltas xustificables: enfermidade acreditada da persoa participante ou outras de forza maior (cita médica, falecemento ou enfermidade grave dun familiar ata 2º grao, traslados familiares motivados, obrigas legais). A participación en actividades extraescolares non xustificará a ausencia durante toda a xornada.
3.3. Modalidades de participación
O acceso terá carácter regular e estable, non estando permitida a participación esporádica. Modalidades de uso:
- Servizo mensual mañá e/ou tarde
- Servizo quincenal mañá e/ou tarde (só en custodia compartida, sen alternancia irregular entre semanas).
Para o servizo de tarde poderase escoller a recollida na primeira quenda (17:00h a 17:15h) ou na segunda (19:00h).
En caso de renuncia deberá comunicarse antes do día 25 do mes anterior (modelo ANEXO II).
4. PRESENTACIÓN DE SOLICITUDES
As solicitudes e a documentación complementaria presentarase segundo o modelo normalizado ANEXO I ben por medios electrónicos ou de xeito presencial no Rexistro xeral do Concello de Antas de Ulla ou mediante calquera das formas previstas no artigo 16.4 da Lei 39/2015 do 1 de outubro, de procedemento administrativo común das administracións públicas.
As solicitudes estarán dispoñibles nas dependencias de servizos sociais do Concello e no taboleiro de anuncios do Concello de Antas de Ulla.
Expirado o prazo de presentación de solicitudes, no caso de que continuasen quedando prazas sen cubrir, o proceso de inscrición quedará aberto durante o curso escolar, sendo necesaria a presentación de instancias como mínimo con 3 días de antelación ao uso do servizo.
4.1. Normas para cubrir os impresos
A solicitude de praza, as autorizacións e as observacións médicas deberán estar asinadas pola totalidade das persoas representantes legais salvo casos de custodia exclusiva ou familias monomarentais ou monoparentais acreditadas.
Cubrirase unha solicitude por participante (ANEXO I). No caso de grupos de irmáns só se entregará unha copia da documentación acreditativa da situación familiar.
A falta de sinatura en cada un dos impresos será motivo de non admisión.
4.2. Prazos
O prazo de presentación de solicitudes será do 18 ó 22 de agosto, ambos incluídos.
Publicarase a listaxe provisional de solicitudes admitidas o 28 de agosto no taboleiro de anuncios do Concello.
Establecerase un período de reclamación e emenda do 29 de agosto ó 1 de setembro, ambos incluídos.
A publicación da listaxe definitiva realizarase o 5 de setembro.
A FALTA DE PRESENTACIÓN DA DOCUMENTACIÓN REQUERIDA IMPLICARÁ A RENUNCIA IMPLÍCITA Á PRAZA.
4.3 Documentación a presentar
a) Impreso normalizado de solicitude debidamente cuberto e asinado (ANEXO I)
b) Copia do DNI/NIE/PASAPORTE da persoa responsable legal
c) Copia do libro de familia ou documento acreditativo da filiación.
d) Copia da tarxeta sanitaria da persoa participante
e) Copia da declaración da renda familiar: conxunta ou individual de todos os membros activos do exercicio 2024. No caso de que algún dos seus membros non tivera obrigación de contribuír deberá presentar documento acreditativo do nivel de rendas do ano 2024 emitido pola Axencia Tributaria.
f) Xustificación da ocupación dos membros da unidade familiar:
- Nos casos de ocupación por conta allea aportarase certificado de empresa que inclúa os horarios laborais.
- Nos casos de ocupación por conta propia aportarase copia do último recibo da cota á seguridade social.
- Persoas en formación presentarán certificado do centro de estudos.
- Nos casos de que existan circunstancias especiais de necesidades de conciliación, acreditación de dita situación (persoas dependentes ao cargo, monomarentalidade ou monoparentalidade, etc.)
g) Informe médico no caso de alerxia ou outras casuísticas a ter en conta para a participación na actividade.
h) Informe técnico nos casos de familias en situación de especial consideración.
i) Copia do convenio regulador de medidas familiares, nos casos que corresponda.
l) Acreditación, de ser o caso, da situación de violencia de xénero mediante algúns dos documentos recollidos no artigo 23 da L.O. 1/2004, de 28 de decembro, de medidas de protección integral contra a violencia de xénero.
As persoas beneficiarias do servizo comprométense a comunicar ao Concello calquera variación na súa situación laboral ou familiar. A non comunicación destes cambios poderá derivar na perda do dereito á praza.
O Concello de Antas de Ulla resérvase o dereito a solicitar documentación complementaria cando as circunstancias alegadas non queden debidamente acreditadas.
5. PROCEDEMENTO PARA ADXUDICACIÓN DAS PRAZAS. CRITERIOS DE ADMISIÓN E BAREMO
No caso de que o número de solicitudes supere a capacidade da oferta, farase unha primeira selección, na que se establecen os seguintes criterios de prelación:
- Necesidade de conciliación: uso continuado do servizo (maior número de días solicitados á semana). Familias monomarentais ou monoparentais con xustificación por traballo ou enfermidade grave que procure necesidade de conciliación, familias nas que traballen os representantes legais ou existan circunstancias especiais de necesidade de conciliación. No caso de familias nas que a custodia a desempeñe unha soa persoa, aquelas nas que traballe a persoa representante legal.
- Nivel de renda e cargas familiares: os criterios para a determinación da renda aparecen recollidos no ANEXO III destas bases.
- Terán carácter prioritario as situacións de violencia de xénero e doutras formas de violencia contra a muller, así como familias en situación de especial consideración.
- En caso de que concorran circunstancias similares conforme aos criterios de valoración anteriores, as prazas adxudicaranse segundo a orde de presentación da documentación no Rexistro.
6. LISTAXE DE AGARDA E RENUNCIA Á PRAZA
As persoas non admitidas pasarán a formar parte dunha lista de agarda, seguindo a orde de valoración.
As persoas que obtiveran praza no programa e finalmente non vaian participar no mesmo, deberán presentar a renuncia por escrito, a través do rexistro do Concello de Antas de Ulla no modelo ANEXO II.
Do mesmo xeito, en calquera momento as persoas representantes legais poderán solicitar a baixa no servizo seguindo o mesmo procedemento.
En caso de renuncia ou baixa dalgunha persoa participante, cubrirase a praza vacante coa seguinte persoa na listaxe de agarda que será contactada por vía telefónica.
No caso de que a persoa que causou baixa volva precisar facer uso do servizo, deberá realizar unha nova solicitude de alta.
A ausencia reiterada e non xustificada implicará a perda da praza dacordo co establecido no punto 3.2 das presentes bases.
7. TRAMITACIÓN DO PROCEDEMENTO
A instrución do procedemento obxecto desta convocatoria corresponde XGL. Unha vez estudadas as solicitudes presentadas polo equipo técnico correspondente, emitirase a listaxe que dará lugar á resolución provisional de solicitudes admitidas na que se detallarán ademais as solicitudes obxecto de exclusión e as solicitudes nas que se deba emendar algunha falta ou defecto na presentación de documentación.
Concluído o prazo de dous días hábiles desde a da publicación da resolución provisional de solicitudes admitidas e unha vez revisada a documentación achegada, resolverase a presente convocatoria. A competencia para a resolución do procedemento desta convocatoria é da Alcaldesa-Presidenta. A resolución definitiva de solicitudes admitidas notificarase ás persoas interesadas mediante a súa exposición no taboleiro de anuncios do Concello e na sede electrónica.
Máis información
Concello Antas de Ulla
Departamento de servizos sociais municipais
📧 eduso.concelloantasdeulla@gmail.com
📞 982 238 014
Consulta aquí as bases e anexos oficiais: Bases e anexos do Programa Municipal de Conciliación 2025/2026
