Uncategorized @gl

O Concello de Antas de Ulla publica o listado definitivo de admitido/as no proceso de selección de persoal interino para o posto de Secretaría-Intervención e as datas do proceso de selección.

A realización dos exercicios da fase de oposición terá lugar o día 25 de abril na Casa do Concello de Antas de Ulla, a partir das 09:30 horas, debendo presentarse todos o/as aspirantes á hora referida, provisto/as da preceptiva
documentación identificativa.

Máis información: https://concellodeantas.sedelectronica.gal/board

Expirado o prazo de presentación de solicitudes de admisión ao proceso e examinada a documentación, quedou aprobada a relación provisional de aspirantes admitido/as e excluídos/as.

Publicada no Taboleiro de Anuncios do Concello, así como na sede electrónica. Os/as interesado/as dispoñen dun prazo de 3 días hábiles para a subsanación de defectos ou omisións, e para reclamacións.

Máis información: https://concellodeantas.sedelectronica.gal/board

O obxecto destas bases é a regulación da bolsa para a selección do persoal interino para o desempeño de postos reservados a persoal funcionario da administración local con habilitación de carácter nacional no Concello de Antas de Ulla.

Toda a información publicouse no BOP de Lugo o día 26 de marzo: https://www.deputacionlugo.gal/gl/node/80736

O Concello de Antas de Ulla rematou unhas obras para mellorar a accesibilidade do edificio da Casa Consistorial, dándolle así un mellor servizo aos veciños e veciñas.

O concello contra agora cun novo ascensor, baños adaptados a persoas con mobilidade reducida e unha porta acristalada de acceso, mellorando así a eficiencia enerxética das instalacións.

“Unhas actuacións coas que melloramos a casa de todos veciños e veciñas, impulsando a accesibilidade e a comodidade das instalacións”, explica a alcaldesa, Pilar García Porto.

Para realizar os traballos, o concello obtivo unha subvención da Xunta de Galicia con fondos europeos destinada “a concellos e mancomunidades para actuacións en materia de accesibilidade de competencia municipal”.

O Concello de Antas de Ulla contratou oficialmente esta mesma mañá a reforma da Casa da Cultura de Antas de Ulla, tras varios meses de intensas xestións “para arranxar coa maior celeridade a neglixencia do anterior goberno local”. As obras estarán rematadas a finais de verán.

Tras o acto administrativo desta mañá de sinatura do contrato entre o concello e a empresa que se vai encargar da execución da obra, o delegado do Goberno en Galicia, Pedro Blanco, asistiu á presentación á veciñanza de Antas de Ulla do proxecto xunto á alcaldesa, Pilar García Porto, e a subdelegada do Goberno en Lugo, Isabel Rodríguez.

O Concello de Antas de Ulla ingresou en decembro de 2022 a subvención de 816.000 euros que lle foi concedida polo Goberno de España con fondos europeos para a reforma da Casa da Cultura, “pero e o anterior alcalde destinou todos eses cartos ó pago de facturas que tiña pendentes”, lembra García Porto.

“É dicir, desviou os fondos públicos con carácter finalista que recibiu o concello para as obras da Casa da Cultura para pagar facturas e débedas. E fíxoo en época preelectoral, durante os seis meses antes ás eleccións municipais, polo que a neglixencia foi absoluta”, engade a alcaldesa.

“Puxémonos a traballar coa maior celeridade, xa que nin sequera había proxecto de execución, e xestionamos un crédito a longo prazo que nos permitirá afrontar a obra sen lastrar a economía do concello”, explica a García Porto. “Conseguimos o crédito grazas a ter uns orzamentos aprobados e en vigor desde o pasado 1 de xaneiro”, afirma.

Este proxecto inclúe a reforma da envolvente enerxética do edificio actual da Casa da Cultura, mellorando o seu illamento e gañando en confortabilidade. Manterase o equipamento da Biblioteca e reordenarase o resto do espazo dispoñible para posibilitar que sexa polivalente e accesible a todas as asociacións culturais do concello.

O BOP de Lugo de hoxe, 29 de xaneiro, publica as bases para a contratación, en réxime de persoal laboral temporal, de 8 prazas de operario/as de servizos múltiples, a xornada completa e durante seis meses, no marco do Progama de Reforzo do Emprego 2024 financiado pola Deputación Lugo.

Ábrese o prazo de presentación de solicitudes, que será de dez días hábiles.

Por outra parte, publicáronse tamén as bases e a convocatoria para a provisión dunha praza de arquitecto/a, funcionario/a interino/a para o Concello de Antas de Ulla.

O prazo de presentación de solicitudes será de dez días naturais.

Toda a información no taboleiro de anuncios da sede electrónica do Concello de Antas de Ulla (https://concellodeantas.sedelectronica.gal) e no BOP de hoxe: https://lc.cx/4J_Cbv

O Concello de Antas de Ulla pechou o ano cun pleno extraordinario para impulsar dous proxectos fundamentais, o Parque Central de Galicia e a reforma da Casa da Cultura.

No primero dos casos, no pleno saiu adiante a aprobación definitiva do Plan Especial do Parque Central-Centro Xeográfico de Galicia, que promove a Deputación de Lugo.

Trátase do último trámite imprescindible para que a Deputación poida iniciar os traballos do proxecto que que dará como resultado o Parque Central de Galicia. “Será un elemento diferenciador a nivel turístico, un recurso único para promocionar o noso concello, xerando emprego e desenvolvemento económico”, asegura a alcaldesa, Pilar García Porto.

Por outra parte, o pleno procedeu á aprobación anticipada e urxente dos pliegos para a licitación das obras de reforma e mellora da eficiencia enerxética da Casa da Cultura de Antas de Ulla.

“Grazas a isto, reducimos á metade os prazos da tramitación administrativa do proxecto”, engade García Porto, que sostén que “a obra pode estar adxudicada en dous meses e a actuación lista a finais do verán”.

Hai que lembrar que os fondos europeos que o anterior goberno local recibiu para as obras da Casa da Cultura hai exactamente un ano “destináronse ao pago de facturas atrasadas e outras partidas”.

“Ante esta situación, tiñamos dúas opcións: ou pedir un crédito para devolver os cartos ó ministerio ou pedir un crédito para executar a obra, que é o que fixemos”, remata Pilar García Porto.

“Rematamos o ano polo tanto acelerando as tramitacións de dous proxectos claves para o futuro do concello, todo elo grazas a que o martes, 1 de xaneiro, entran en vigor os orzamentos municipais do 2024”, remata a alcaldesa, Pilar García Porto.

O Partido Popular abstívose no punto do Parque Central e votou en contra no caso da Casa da Cultura.

O Concello de Antas de Ulla implanta nas súas rúas o contedor marrón para comezar a recollida da fracción orgánica.

“Deste xeito, no concello avanzamos no cumprimento das obrigas legais recollidas na recente lei de residuos estatal, onde se establece que os concellos deberán instaurar antes do 31 de decembro de 2023 a recollida separada dos residuos de tipo orgánico”, explica a alcaldesa, Pilar García Porto.

Este programa consiste na instalación do contedor marrón na rúa, que se centrará na área urbana do concello, así como ao longo da nacional 640 ao seu paso por Santo Estevo de Castro Amarante, San Xoán de Antas e Santiago de Dorra, dando servizo aos establecementos de grandes xeradores de refugallo orgánico como as superficies de alimentación, panaderías, froitarías e integrantes do canal Horeca.

De igual xeito, pretendese dar servizo ás vivendas que se atopen a menos de 150 metros da localización destes contedores marróns.

Os contedores, que terán unha capacidade de 240 litros están dotados dun peche con chave, co fin evitar o depósito neles de residuos de natureza distinta da orgánica e poder asegurar unha participación responsable.

A este respecto, o tipo de residuos admitidos indicarase no propio contedor, permitíndose: restos de alimentos, tanto cociñados como crús, papel de cociña usado, pousos de café e pequenos restos de plantas e céspede, entre outros.

O depósito de residuos no contedor deberá facerse sempre en bolsas compostables, residuos que finalmente serán tratados na planta de compostaxe de Sogama (Sociedade Galega de Medio Ambiente).

A participación na nova recollida, a solicitude da correspondente chave, así como de bolsas compostables é totalmente de balde e pode facerse no teléfono do concello, 982 37 92 51 ou escribindo a concello.antasdeulla@eidolocal.es.

No momento da inscrición deberá indicarse un nome e teléfono de contacto así como o enderezo da vivenda ou establecemento, deste xeito, os usuarios inscritos contarán dende o ano 2024 cunha bonificación do 30 % no recibo da prestación do servizo de recollida de lixo.

Esta bonificación, será tamén de aplicación aos usuarios do programa de compostaxe doméstica no que leva traballando o equipa técnica do Concello de Antas de Ulla dende o ano 2020.

Co fin de dar a coñecer o funcionamento do novo contedor, o concello de Antas de Ulla está a desenvolver unha campaña de comunicación dirixida á cidadanía e aos grandes produtores de fracción orgánica do concello, a que dará continuidade durante todo o ano 2024.

Este proxecto atópase cofinanciado pola Xunta de Galicia a o Ministerio para a Transición Ecolóxica e o Reto Demográfico a través dos Fondos Next Generation da UE.

O Concello de Antas de Ulla porá en marcha ao longo de 2024 un novo servizo de punto limpo móbil que percorrerá todo o municipio para a recollida de diferentes tipos de residuos que non se poden depositar nos contedores convencionais.

O punto limpo móbil está cofinanciado pola Unión Europea a través do fondo relativo ao Mecanismo de Recuperación e Resiliencia da UE – NEXT GENERATION EU, contando cunha axuda de 54.000 euros.

Neste punto limpo, que estará situado periodicamente nas diferentes parroquias cuns horarios e puntos prefixados, poderán depositarse residuos tales como restos metálicos do fogar, lámpadas e tubos fluorescentes, aerosois, pilas e baterías de electrodomésticos, xoguetes, cartuchos de impresora ou pequenos electrodomésticos.

A alcaldesa de Antas de Ulla, Pilar García Porto, destaca que “este novo servizo, que chegará a toda a poboación do concello, servirá para facilitar a reciclaxe de todo tipo de residuos e que Antas de Ulla sexa un municipio limpo e sostible”.

O Concello de Antas de Ulla aproba uns orzamentos de 3.847.226,62 euros, cunha clara aposta social e 1,4 millóns para investimentos reais.

“Por primeira vez, o concello terá uns orzamentos en vigor o 1 de xaneiro de 2024, unhas contas en tempo e forma, realistas e planificadas para mellorar a vida da veciñanza”, asegura a alcaldesa, Pilar García Porto.

“A caótica xestión económica do anterior goberno obrigounos a un redeseño total da área económica municipal, co obxectivo de traballar con realismo e ser útiles aos veciños e veciñas”, engadiu a alcaldesa.

Entre as prioridades para o 2024, García Porto destaca as políticas sociais, entre elas o Servizo de Axuda no Fogar (SAF), e os investimentos reais nos servizos e infraestruturas públicas, cunha partida de 1.414.805 euros.

A alcaldesa considera tamén fundamental “a reforma da Casa da Cultura, para o que o concello decidiu suscribir un préstamo de 850.000 euros”.

Hai que lembrar que os fondos europeos que o anterior goberno local recibiu para as obras da Casa da Cultura “destináronse ao pago de facturas atrasadas e outras partidas”. “Ante esta situación, tiñamos dúas opción: ou pedir o crédito para devolver os cartos ó ministerio ou pedir o crédito para executar a obra, que é o que imos facer”, remata Pilar García Porto.