Uncategorized @gl

O Concello de Antas de Ulla foi beneficiario dunha axuda da Xunta de Galicia, cofinanciada pola Unión Europea a través do programa NextGenerationEU, dentro do Plan de Recuperación, Transformación e Resiliencia.

Esta subvención procede da convocatoria regulada pola Orde do 17 de decembro de 2024, destinada ao financiamento de actuacións municipais en materia de residuos para a implantación e mellora das recollidas separadas de biorresiduos, aceites de cociña usados e téxtiles.

🟢 Actuación aprobada: Liña 2
🛠️ Proxecto: “Mellora e ampliación da rede de compostaxe local no Concello de Antas de Ulla”
📄 Expediente: BIAT-0101-2025-RES

Grazas a esta axuda, o noso concello poderá seguir avanzando cara a unha xestión máis sostible dos residuos, ampliando a rede de puntos de compostaxe e facilitando que a veciñanza poida participar activamente na reciclaxe e no coidado do medio ambiente.

✨ Seguiremos informando nos vindeiros meses sobre os avances do proxecto e as súas fases de implantación.

O Concello de Antas de Ulla continúa traballando para mellorar os servizos públicos e promover un modelo máis verde, eficiente e responsable.

O Concello de Antas de Ulla informa da apertura do período de consulta pública previa á elaboración da futura Ordenanza reguladora do uso común especial do dominio público local polas actividades extractivas de madeira nos montes e espazos forestais.

Esta actuación enmárcase no previsto polo artigo 133.1 da Lei 39/2015, do 1 de outubro, do Procedemento Administrativo Común das Administracións Públicas, co obxectivo de facilitar a participación da cidadanía e das organizacións potencialmente afectadas na elaboración de novas normas municipais.

📌 Aspectos sobre os que se solicita a opinión da veciñanza e das entidades

Queda aberto un proceso de recollida de achegas sobre:

Problemas que se pretenden solucionar coa iniciativa
Manter os camiños e vías públicas de titularidade municipal en perfecto estado para o tránsito de vehículos e peóns. A actividade extractiva de madeira provoca danos que fan precisa a creación dunha taxa para cubrir os custos de reparación destes desperfectos.

Necesidade e oportunidade da súa aprobación
Resulta necesario previr, minimizar ou corrixir os efectos que o tránsito de vehículos de tracción mecánica —de uso industrial, comercial ou de transporte de madeira— causa nas vías municipais.

Obxectivos da norma
Regular e garantir o financiamento das reparacións dos danos derivados das actividades de extracción e transporte de madeira.

🗓️ Prazo para presentar achegas

As persoas, organizacións ou asociacións interesadas poden enviar as súas opinións e suxestións durante un prazo de dez (10) días, contados desde o día seguinte á publicación deste anuncio na web municipal.

As achegas poderán presentarse:

A través da sede electrónica do Concello.

En calquera dos lugares previstos no artigo 16 da Lei 39/2015.

Con esta actuación búscase a mellora do firme na rede viaria municipal no Concello de Antas de Ulla, en concreto do camiño que vai dende o núcleo de Cibreiro a Peibás, coa finalidade de aumentar a seguridade viaria dos usuarios e a vida útil do camiño en termos xerais.

Así mesmo, no ámbito do viario do municipio, tamén se está realizar un estudo integral da rede viaria municipal.

Financiamento: Ambas as actuacións están cofinanciadas pola Xunta de Galicia, a través da Axencia Galega de Desenvolvemento Rural AGADER, cunha subvención total de 84.764,00 €, ao abeiro de Resolución de 19 de decembro de 2023, da Axencia Galega de Desenvolvemento Rural, pola que se aproba o Plan marco de mellora de camiños municipais de acceso a parcelas agrícolas 2024-2025, cofinanciado co Fondo Europeo Agrícola de Desenvolvemento Rural (Feader) ao abeiro do Programa de desenvolvemento rural (PDR) 2014-2020, mediante tramitación anticipada de gasto, de acordo co seguinte cadro de financiamento:

ANUALIDADE 2024 (48,718%)

Xunta de Galicia (AGADER): 41.295,33 €

ANULIDADE 2025 (51,282%)

Xunta de Galicia (AGADER): 43.468,67 €

DISTRIBUCIÓN POR FONDOS:

FEADER (75%): 63.573,00 €

MAPA (7,5%): 6.357,30 €

XUNTA (17,5%): 14.833,70 €

O Concello de Antas de Ulla celebrou onte un pleno extraordinario para aprobar o pliego coas características técnicas para a contratación do novo subministro eléctrico municipal.

Este paso forma parte da sinatura dun convenio interadministrativo de colaboración cos concellos de Monterroso, Guntín, Palas de Rei, Portomarín e Taboada para impulsar a reducción do consumo e a factura enerxética.

O convenio inclúe un estudo estratéxico individualizado para o aforro enerxético no Concello de Antas de Ulla e, por outra parte, os seis concellos prevén contratar de forma centralizada e conxunta a subministración de enerxía eléctrica para as dependencias, instalacións e iluminación pública mediante procedemento aberto.

“O obxectivo é optimizar os recursos enerxéticos, buscando o aforro e a reducción de costes do subministro eléctrico”, explica Pilar García Porto, que lembra que é “un paso máis, xa que tamén cambiamos no concello a compañía comercializadora”.

Ademais, o concello debe facer fronte aos 319.000 euros de débeda por impagos herdada do anterior goberno local.

Por un lado, 84.378,24 euros que o concello debe pagar, por sentenza xudicial do 30 de decembro de 2020, por non cumprir os pagos pactados por Naturgy polos impagos do subministro entre os anos 2015 e 2017.

Os outros 234.622,57 euros derivan de impagos entre os anos 2017 e 2023. “Agora, todos os veciños e veciñas debemos pagar esa débeda mentres abonamos todos os meses a actual factura”, remata García Porto.

O Concello de Antas de Ulla abre unha convocatoria para a selección dunha praza de operario de servizos múltiples.

O prazo de presentación de solicitudes é de cinco días hábiles contados a partir do seguinte á publicación da convocatoria na páxina web do Concello de Antas de Ulla. É dicir, desde hoxe, xa que se publicou onte.

Bases completas: https://concellodeantas.sedelectronica.gal/board

Con esta actuación buscábase a mellora do firme na rede viaria municipal no Concello de Antas de Ulla, en concreto o acceso aos núcleos de poboación de Quintela e de Cervela (Pq. San Miguel de Cervela) por estradas de titularidade municipal que conectan directamente coa estrada provincial LU-P-4002 de Palas de Rei a Antas de Ulla, e a intercomunicación cos núcleos de poboación cercanos, e entre eles.

Financiamento: Esta actuación está cofinanciada pola Xunta de Galicia (Axencia Galega de Desenvolvemento Rural AGADER), ao abeiro de Resolución do 28 de febreiro de 2023 para a concesión das axudas correspondentes ao Plan de mellora de camiños rurais 2023-2024, cofinanciado co Fondo Europeo Agrícola de Desenvolvemento Rural (Feader) no marco do Plan estratéxico da PAC 2023-2027 en Galicia, en réxime de concorrencia non competitiva, publicada no DOG nº 44 do 3 de marzo de 2023, de acordo co seguinte cadro de financiamento:

ANUALIDADE 2023 (34,71%)

Xunta de Galicia (Axencia Galega de Desenvolvemento Rural AGADER): 25.977,57 €
ANULIDADE 2024 (65,29%)

Xunta de Galicia (Axencia Galega de Desenvolvemento Rural AGADER): 48.8164,18 €

Máis de 200 persoas concentráronse hoxe diante do Centro de Saúde de Antas de Ulla para esixir “unha asistencia sanitaria digna e de calidade”.

Os veciños e veciñas acudiron á chamada do concello e da súa alcaldesa, Pilar García Porto, que o mes pasado demandoulle por carta ao conselleiro de Sanidade, Antonio Gómez Caamaño, “que cubra a praza do médico xubilado no centro de saúde”, ademais de pedirlle información “sobre a construción do novo centro de saúde comprometido pola Xunta de Galicia en campaña electoral”.

A carta enviouse o pasado 21 de xuño e, ante a ausencia de resposta, a alcaldesa convocou a todos os veciños e veciñas do Concello de Antas de Ulla á concentración.

“Os concellos do rural temos os mesmos dereitos que os demais e necesitamos uns servizos públicos de calidade para frear a despoboación”, asegurou hoxe a alcaldesa. “Coa saúde non se pode xogar”, afirmou.

A alcaldesa pídelle ao conselleiro, Antonio Gómez Caamaño, “a súa urxente intervención nun asunto de vital importancia, xa que esta ausencia dun profesional sanitario está a xerar serias dificultades para prestar a atención médica necesaria, especialmente aos nosos maiores, que requiren unha atención constante e especializada”.

“Actualmente a doutora que atende o centro de atención primaria traballa pola mañá e varios días á semana reforza con traballo tamén en xornada de tarde”, engade Pilar García Porto.

O feito de contar cunha única doutora “xa ocasionou que a nosa veciñanza quedara sen atención médica no seu centro, e esta situación verase agravada nos períodos de vacacións ou de ausencia por calquera outro motivo da doutora”.

O Concello de Antas de Ulla publica hoxe as bases que rexerán a convocatoria para a contratación de tres socorristas durante dous meses e medio.

Serán contratacións a xornada completa para traballar durante a tempada estival na piscina municipal (desde o 1 de xullo).

Máis información: https://concellodeantas.sedelectronica.gal/board