4ª dose da vacina da covid-19

O Concello de Antas de Ulla facilitaralle o traslado ao HULA a aquelas persoas maiores de 80 anos que o precisen ou o demanden para poñer a 4ª dose da vacina da covid-19. Tan só teñen que poñerse en contacto co Concello ou pedilo nas Oficinas Municipais.

No caso de que non se poida acudir á cita, está planificado desde o principio a vacinación como “repesca” nos centros de saúde de cabeceira así como nos domicilios nos pacientes inmobilizados. En aproximadamente 15 días chámaselles e vacínaselles no seu centro de saúde ou no seu domicilio no caso de que sexa necesario. Este procedemento xa se utilizaba antes.

Hai varios motivos polos que o Sergas cita aos maiores en grandes recintos:

  • Alíviase a Atención Primaria de traballo.
  • Son moitos os colectivos e persoas que pediron acudir a recintos máis grandes, onde é máis fácil o aparcamento e hai un servizo de axuda, con voluntarios, para os maiores con problemas de mobilidade ou de calquera outro tipo.
  • O obxectivo é vacinar a toda a poboación no menor tempo posible, facilitando todos os dispositivos posibles e sendo flexibles e sensibles a todas as circunstancias persoais e de saúde na poboación.

Se precisas axuda, chama ou pásate polo Concello de Antas de Ulla.

O Concello e a Banda de Música de Antas de Ulla asinan un acordo de colaboración para levar as súas actuacións ás festas parroquiais

O Concello e a Banda de Música de Antas de Ulla asinan un acordo de colaboración para levar as súas actuacións ás festas parroquiais. O Goberno local comprométese a financiar os concertos que dará a formación musical que xa suma máis de 125 anos de historia.

O alcalde de Antas de Ulla, Javier Varela, e a presidenta da Escola Banda de Música de Antas de Ulla, Candela Maceda, mantiveron unha reunión de traballo na que acordaron que todas aquelas festas que teñan romaría poden ter actuación da banda, sempre que o soliciten.

O Concello de Antas de Ulla será o encargado de sufragar as actuacións, de maneira que estas no terán custo para as comisións de festas.

En base a este acordo a Banda de Música de Antas de Ulla ofrecerá un pasarrúas de mañá, tocará na misa ou procesión e fará un concerto de mediodía naquelas romarías que sexan os festivos ou as fins de semana.

Tanto o rexedor de Antas de Ulla como a presidenta da Escola Banda de Música de Antas de Ulla remarcan a importancia deste acordo que se pon en marcha este mesmo verán e que permitirá que todos os veciños e veciñas gocen da música da banda do pobo. “Permitirá achegar a súa música a máis xente e animar a aquelas persoas que desexen sumarse á formación”, destaca Javier Varela.

“Temos dous concertos á vista, un o de fin de curso da Escola de Música o día 18 e outro o 24 de xuño, que tocaremos a mediodía e á noite”, Candela Maceda, presidenta da Escola Banda de Música de Antas de Ulla

Hoxe conversamos con Candela Maceda Vázquez, unha moza de 19 anos con raíces no noso Concello e estudante de enfermería que vén de asumir a presidencia da Escola Banda de Música de Antas de Ulla.

Cando e como chega Candela á Banda de Antas de Ulla?
Nacín no Concello de A Pobra de Brollón, pero por motivos familiares con 11 anos trasladeime a vivir á casa dos meus avós en Antas de Ulla.
Debido a que moitos dos meus amigos formaban parte desta asociación e me traía certa inquedanza, comecei a formar parte desta escola de música no ano 2016, matriculándome en trompa e solfexo.

Vén de facerse un proceso para elixir novo director, tamén houbo cambios na directiva?
Este último ano houbo cambios consecutivos na asociación, comezamos pola renovación da xunta directiva cambiando os cargos e os integrantes desta e posteriormente coa elección dun novo director.
Algúns integrantes decidiron tomarse un descanso logo de anos ao fronte desta asociación, xa que implica moitas horas de traballo e dedicación.

Agora ti ocupas o posto de presidenta, que obxectivos te marcas?
O obxectivo principal é manter a motivación dos músicos e a unión entre estes. Para iso xa estamos traballando en actividades como o intercambio con outras bandas de música de fóra da nosa comunidade, o campamento musical…
Por outra parte, teño como obxectivo seguir mellorando a calidade da formación, así como o aumento de integrantes desta.

Que equipo de acompaña?
Somos unha directiva moi nova e traemos moitas ganas de traballar e facer cousas novas. Forman parte dela Hugo Mariño, Javier Valiño, María Vázquez e Ana Rodríguez.

Como consideras que se atopa a nivel musical a banda de música e a escola?
A pandemia do Covid-19 prexudicounos a nivel de que diminuímos un pouco no número de músicos, pero a pesar diso considero que temos un bo nivel musical tanto na escola como na banda, grazas a todo o profesorado que forma parte desta asociación.

Banda de Música de Antas de Ulla.

Cantos socios forman parte da banda agora mesmo?
Na actualidade, temos arredor duns 100 socios.

Haberá unha captación de novos socios? De que maneira se vai facer?
Estamos traballando niso, o traballo está consistindo en que a directiva fala cos diferentes veciños facéndolles a proposta e posteriormente, no caso de que acepten colaborar coa asociación, estes cobren unha folla de rexistro que a nós nos permite identificalos e enviarlles as invitacións aos concertos, carné de socio, novidades…

Que plans tedes a curto prazo?
A curto prazo buscamos poder retomar as nosas actuación nas festas ao longo do verán, e ademais temos dous concertos á vista, un deles será o concerto de Fin de Curso da nosa escola de música o día 18 de xuño. E o outro concerto será o 24 de xuño, que coma sempre nas festas do Concello actuaremos á mediodía e á noite, no cal faremos a presentación do noso novo director Andrés.

E a longo prazo?
De cara o curso que vén estamos planteando cambios na nosa escola de música, sempre coa intención de mellorar as condicións e a motivación do alumnado.

Que colaboración esperas dos veciños e veciñas de Antas?
Que poidamos aumentar o noso número de socios, xa que para nós é de gran axuda. E por outra parte, o seu apoio en cada un dos concertos que fagamos.

Dicía Toirán que a Banda é un ben cultural moi importante, pensas o mesmo?
Considero que a banda de Antas, logo dos seus 125 anos de historia é un ben que debemos conservar, xa que no noso Concello hai unha gran parte dos veciños que dun xeito ou de outro están ou estiveron vinculados con ela.

Ademais, de que esta leva o nome do noso pobo alí por onde vaiamos.

Candela Maceda (no centro).

“A Banda de Música de Antas é un ben cultural moi importante para a vila, xa que leva o seu nome alá onde vai”

O mozo natural de Láncara Andrés Álvarez Toirán (1994) vén de facerse coa batuta da Escola Banda de Música de Antas de Ulla. Hoxe conversamos con el para coñecelo un pouco mellor e saber os proxectos que ten para a formación.

O novo director comezou os seus estudos profesionais de música no Conservatorio Xoán Montes de Lugo e rematou no Conservatorio Profesional de Santiago de Compostela. Posteriormente, cursou os estudos superiores de música no Conservatorio Superior de Música de A Coruña.Anuncia un evento de fin de curso para o 18 de xuño con todos os alumnos e alumnas da Escola de Música e a actuación da Banda polo San Xoán.

Quen é Andrés Álvarez Toirán? Cal é a túa procedencia a nivel persoal e musical?

Crieime na miña vila natal A Pobra de San Xiao (Láncara) e comecei os meus estudos no Conservatorio Profesional de Lugo aos 9 anos de idade. Son o primeiro músico da miña familia e comecei nesta profesión grazas a meus pais, que me animaron a formar parte da banda de música que había por aquel momento no meu pobo. Posteriormente, e gracias a eles, anoteime no Conservatorio de Lugo.

Por motivos laborais, trasladámonos a Santiago de Compostela e alí rematei o Grao Profesional. Tras as dúbidas típicas dun adolescente ao rematar o Bacharelato, decidinme a continuar coa miña formación musical para poderme dedicar ao que hoxe en día é a miña profesión.

Andrés Álvarez Toirán cos músicos da Escola Banda de Música de Antas de Ulla.

Como chegas á Banda de Música de Antas de Ulla?

Xa tocara coa Banda de Música de Antas de Ulla en varias ocasións, levando sempre unha moi boa impresión da formación en canto á calidade humana e musical. Por iso, cando vin que abrían o proceso de selección para a elección dun novo director, non o dubidei e presenteime.

Cal é o teu proxecto para a formación?

En primeiro lugar, gustaríame continuar co traballo de calidade que se veu realizando ata o de agora por parte da directiva e de Javier.

Penso que a Banda de Música de Antas é un ben cultural moi importante para a vila, xa que leva o seu nome alá onde vai. Por iso, intentarei que a calidade musical sexa sempre unha premisa fundamental no noso traballo diario para así alcanzar os maiores éxitos posibles.

E os plans para a Escola de Música?

A Escola de Música é o piar fundamental sobre o que se sostén a Banda. Gracias á formación que se ofrece, o alumnado adquire uns coñecementos musicais que lle permiten desenvolverse. Canto mellor sexa a formación ofrecida, mellores serán os resultados futuros da Banda. Porén, estamos a organizar un campamento musical no que se ofrecerán masterclass con músicos de renome para todos os alumnos da escola.

Xa tiveches os primeiros ensaios? Como foi a acollida?

Si, a verdade é que dende o primeiro momento a acollida foi moi boa. Durante estes primeiros ensaios deime conta de que a maiores de ser compañeiros de atril, os músicos da banda son unha piña e isto fai que me sinta como na casa.

Tedes xa algún concerto ou actuacións previstas de cara o verán?

O certo é que si. Estamos a preparar xa o remate do curso da Escola de Música cun evento que levaremos a cabo o día 18 de xuño, no que participarán todos os alumnos. A maiores, temos tamén o ollo posto na actuación que realizaremos durante as festas de San Xoán, para a que xa estamos ensaiando con moito entusiasmo.

Entre os obxectivos desta nova etapa está o de captar novo alumnado? Tentando chegar tamén a concellos cercanos?

A verdade é que si, o incremento do alumnado sempre é un aliciente que garante o futuro da formación e que nos anima a seguir traballando. Porén, sempre temos as portas abertas a todo o mundo que queira formar parte da Escola e da Banda de Música de Antas de Ulla. A día de hoxe, algúns alumnos e compoñentes da banda veñen dende outros concellos, o que nos demostra que estamos ante un ben cultural que debemos conservar e polo que debemos loitar.

Andrés Álvarez Toirán.

O programa da Xunta ‘Coidados Porta a Porta’ visitará o Concello de Antas de Ulla en agosto

A Consellería de Política Social vén de confirmarlle ao Concello de Antas de Ulla que o programa ‘Coidados Porta a Porta’ visitará a localidade os días 11, 12, 16 e 17 de agosto. O servizo instalarase na Praza Nova e as persoas interesadas poden pedir cita previa chamando ao teléfono 622 748 283 ou enviando un correo electrónico a coidadosportaaporta.politicasocial@xunta.gal

O programa, que xa tivo unha fase experimental en 2019 na que participaron 20 concellos, consiste na habilitacións de oito autobuses que se encargan de percorrer as zonais rurais para ofrecer os coidados médicos de proximidade a persoas maiores de 55 anos.

Trátase dun servizo formado por unidades móbiles nas que os maiores de 55 anos acceden gratuitamente a servizos de audioloxía, podoloxía e estimulación da memoria para aquelas persoas que residen en zonas rurais e non teñen facilidades de acceso a este tipo de prestacións.

Os recursos que ofrecen as unidades móbiles van rotando polos diferentes concellos de Galicia con estadías de varios días en cada un deles.

O traballo documental sobre o Servizo de Axuda no Fogar de Antas de Ulla recibe un premio internacional

O traballo documental sobre o Servizo de Axuda no Fogar de Antas de Ulla estreado o pasado mes de decembro vén de recibir un premio internacional e de ser seleccionado noutro festival en Italia. En concreto, o proxecto foi galardoado como mellor curtametraxe documental no Festival de Milán (Milan Gold Awards) e participou na selección oficial do Festival de Florencia (Florence Film Awards), na categoría de mellor curtametraxe documental.

Este traballo documental, creado pola produtora lucense 60Ráfagas, foi realizado para o acto de entrega da Medalla de Ouro do Concello de Antas de Ulla ao Servizo de Axuda no Fogar, que se celebrou o 22 de decembro de 2021 e estivo presidido polo Xefe do Executivo Galego, Alberto Núñez Feijóo.

No traballo, cuxa rodaxe se prolongou varias semanas, pódese ver o día a día das persoas receptoras da axuda no fogar de Antas de Ulla e a atención que reciben por parte das súas coidadoras.

O Concello de Antas de Ulla pretendía que fora unha homenaxe a todas as mulleres que conforman o servizo e ao seu bo facer, nomeadamente pola súa enorme labor durante a pandemia.

Este recoñecemento, sinala o rexedor, Javier Varela, “serve para que o vídeo se volva ver e para seguir dándolles as grazas ás coidadoras polo seu traballo e pola súa entrega diaria”.

Aproveita tamén para agradecerlles ás familias que participaron no proxecto “a súa xenerosidade á hora de abrirnos as portas dos seus fogares”. Unha gratitude que estende tamén á produtora 60Ráfas “pola súa empatía e por ter captado tan ben o día a día dun servizo fundamental para o Concello de Antas de Ulla, que se vén prestando desde hai máis de 25 anos”.

O vídeo pódese ver no seguinte enlace:

https://www.youtube.com/watch?v=13rj6zPzaaU

A Biblioteca Pública Municipal de Antas de Ulla convoca o Certame de narración e debuxo infantil Letras Galegas 2022

A Biblioteca Pública Municipal de Antas de Ulla vén de convocar o Certame de narración e debuxo infantil Letras Galegas 2022. O certame réxese polas seguintes bases:

Poden participar todas as nenas e nenos con:

A) Narracións, en galego, cunha extensión máxima dun folio por unha soa cara, sobre o tema proposto a continuación: “O QUE PASA AO MEU ARREDOR”: Observa o mundo. Non precisas subir nun foguete nin nun avión. Mira ao teu arredor. Que ves? Que pasa? Como te sentes? Podes contalo. Podes debuxalo. O que ves, o que sentes, o que pensas é importante. É a túa visión do mundo. E a para nós, é valioso.

B) Debuxos, feitos sobre cartolina de tamaño aproximado de DIN A4, sobre o tema proposto a continuación: “O QUE PASA AO MEU ARREDOR”: Observa o mundo. Non precisas subir nun foguete nin nun avión. Mira ao teu arredor. Que ves? Que pasa? Como te sentes? Podes contalo. Podes debuxalo. O que ves, o que sentes, o que pensas é importante. É a túa visión do mundo. E a para nós, é valioso.

Cada autor pode presentar cantos traballos desexe, mecanografados, escritos a computador ou a man; neste último caso sempre a bolígrafo e nunca a lapis. Con cada traballo, acompañarase unha folla co nome e demais datos do autor.

Establécense tres categorías: A, ata 8 anos, B, de 9 a 11 anos, C, de 12 a 16 anos.

O prazo de presentación dos traballos rematará o vindeiro 5 de maio, debendo ser entregados polos seus autores na Biblioteca Pública Municipal.

O xurado, formado por persoas entendidas na materia, seleccionará por cada modalidade e categoría un máximo de tres traballos.

O fallo do xurado local farase público antes do Día das Letras Galegas.

Os traballos premiados nesta fase local participarán na fase provincial do certame, convocada pola Biblioteca Pública de Lugo, co patrocinio da Consellería de Cultura, Educación e Universidade da Xunta de Galicia.

Os traballos premiados pasarán a ser propiedade da Biblioteca Pública que se reserva o dereito de publicación dos mesmos.

Todas as incidencias non previstas nestas bases serán resoltas polo xurado.

A presentación das obras a este Certame supón a aceptación das presentes bases.